आईतवार २५ श्रावण, २०७७ (Sunday August 09, 2020)

लकडाउनपछि सरकार फेरिने, प्रधानमन्त्री खोज्दै प्रचण्ड, कांग्रेसको समर्थन !

सोमबार ८ बैशाख, २०७७ गोर्खालि न्युज 1409


लकडाउनपछि सरकार फेरिने, प्रधानमन्त्री खोज्दै प्रचण्ड, कांग्रेसको समर्थन !

काठमाडौं । विश्वव्यापी कोरोनाको महामारीका कारण विश्व नै लकडाउनको अवस्थामा रहेपनि नेपाली राजनीति भने भित्रभित्रै खतरनाक खेलको तयारीमा रहेको खबरहरु आउन थालेका छन् । यस्तो खेल सफल भएमा कोरोनाका कारण सिर्जित लकडाउन सकिएलगत्तै नेपालमा स्थायी भनिएको केपी शर्मा ओली नेतृत्वको वर्तमान सरकारको भविष्य नै संकटमा पर्नेछ ।

नेपाली राजनीतिलाई नजिकबाट बुझ्नेहरु पछिल्लो समय सरकारको काम गराईबाट असन्तुष्ट बनेकाहरु नयाँ राजनीतिक खेलमा लागेको बताउँछन् । यस्तो खेलको नेतृत्व वर्तमान सरकारको नेतृत्व गरिरहेको नेपाल कम्युनिष्ट पार्टीका अध्यक्ष पुष्पकमल दाहालले नै गरिरहेको बताइन्छ ।

केहीदिन अघि नेपाली कांग्रेसका सभापति एवं प्रमुख प्रतिपक्षी दलका नेता शेरबहादुर देउवाले कोरोना रोकथामका लागि भन्दै पूर्व प्रधानमन्त्रीहरुसंग टेलिफोन संवाद गरेका थिए । सोही क्रममा देउवाले पूर्वप्रधानमन्त्रीसमेत रहेका नेकपा अध्यक्ष पुष्पकमल दाहालसंग पनि टेलिफोन संवाद गरेका थिए । सो क्रममा देउवाले सरकारको कामगराईप्रति असन्तुष्टी व्यक्त गरेका थिए । विगतदेखि नै सरकारले प्रतिपक्षीको आवाज नसुनेको र राष्ट्रिय संकटका बेलामा पनि पर्याप्त काम गर्न नसकेको देउवाको गुनासो थियो । सोही क्रममा नेकपा अध्यक्ष दाहालले सरकारको कामबाट आफूपनि सन्तुष्ट नरहेको बताएका थिए । दाहालले सरकारको कामबारे असन्तुष्टी जनाउनुलाई गम्भीरताका साथ लिइएको छ । सोही क्रममा भावी राजनीतिबारे पनि देउवा र दाहालबीच पर्याप्त छलफल भएको बताइन्छ ।

नेकपा अध्यक्ष दाहालले नै कोरोना महामहारीबाट जोगिन उच्चस्तरीय राजनीतिक संयन्त्र आवश्यक रहेको बताएका थिए । दाहालको प्रस्तावमा प्रधानमन्त्री केपी शर्मा ओलीले असहमति जनाएपनि संसदमा रहेका समाजवादी पार्टी, राष्ट्रिय जनता पार्टी र राप्रपाले सहमति जनाइसकेका छन् । नेपाली कांग्रेसले तत्काल यस्तो संयन्त्र निर्माणको प्रस्ताव मान्य नरहेको बताएको छ । यद्यपि वर्तमान सरकारलाई विस्थापित गर्ने परिस्थिति बन्ने भएमा कांग्रेस त्यसका लागि तयार हुनेछ ।

आफ्नो प्रस्तावमा प्रधानमन्त्री असहमत भएपनि नेकपा अध्यक्ष दाहालले एक अन्तर्वार्तामा सबै दललाई मिलाएर लैजानुपर्ने र उच्चस्तरीय संयन्त्र बनाउनुपर्ने प्रस्तावको बचाउ गरेका छन् । सो क्रममा उनले घुमाउरो ढंगबाट सर्वदलीय सहमति नै अहिलेको आवश्यकता भएको बताएका छन् । यस्तो सर्वदलीय सहमति केपी ओलीको नेतृत्वमा बन्न नसक्ने दाहालको आँकलन छ । यहीकारण उनले ओलीको विकल्पबारे पार्टीभित्रै छलफल गरिरहेका छन् । हालै वरिष्ठ पत्रकार देवप्रकाश त्रिपाठीद्वारा सम्पादित घटना र विचारले पनि सरकार फेरिन लागेको बारे विशेष समाचार संप्रेषित गरेको छ । पत्रकार त्रिपाठीले सामाजिक सञ्जालबाटै पनि सरकार फेरिने सम्भावना औल्याएका छन् ।

उनले लेखेका छन्, ” प्रचण्ड चुपचाप छन भन्ने लागेको छ भने त्यो गलत , उहाँ केपीको सरकार बिस्थापित गरि बाकीलाई समेटेर नया सरकार बनाउने अन्तिम तयारीमा हुनुहुन्छ।”

राजनीतिक सूत्रहरुका प्रधानमन्त्री केपी शर्मा ओलीको कार्यशैलीप्रति नेकपाभित्र बहुमत नेताहरु असन्तुष्ट छन् । दाहालसहित झलनाथ खनाल, माधवकुमार नेपाल, वामदेव गौतम लगायतले यसअघि नै प्रधानमन्त्री ओलीविरुद्ध मोर्चा कसिसकेका थिए । प्रधानमन्त्री ओलीले सचिवालय बैठकमा निरीहता प्रकट गरेको र कोरोनाको प्रकोप सुरु भएका कारण २ महिना अघि थालिएको यो राजनीतिक कोर्स सफल हुन सकेको थिए । जानकारहरु नेकपा विभाजन नगरी ओलीलाई संसदीय दलबाट हटाउने, माधव नेपाललाई भावी प्रधानमन्त्री बनाउने, राष्ट्रिय सरकारको पहल गरी कांग्रेसलाई सरकारमा सहभागि गराउने र उच्चस्तरीय राजनीतिक संयन्त्रको नेतृत्व दाहालले गर्ने अवस्था बन्ने बताउँछन् । कांग्रेसभित्र पनि ओलीलाई तत्काल विस्थापित गर्नसके बहुमतका बलमा नेकपाले गरेको सत्ताको दुरुपयोग तत्काललाई टर्ने र नयाँ राजनीतिक कोर्सबाट पार्टीले फाइदा लिनसक्ने मत संस्थापन पक्षमा बढी रहेको छ । नेकपाभित्रबाटै यस्तो खेल अघि बढेर निष्कर्षमा पुग्ने देखिए कांग्रेसले अन्तिममा समर्थन जनाउनेछ ।

सत्ता समीकरण फेरिने यो सम्भावनालाई नेकपाको संस्थापन पक्षले भने इन्कार गर्दै आएको छ । यद्यपि प्रचण्डलाई नजिकबाट बुझ्नेहरु प्रचण्ड आफैले सहमतीय सरकारको नेतृत्व गरेर भएपनि नयाँ सन्देश दिने सम्भावना उत्तिकै रहेको बताउँछन् ।


                                                                                                       साभार - अर्थपुर्ण अन-लाईन न्यूज




यसमा तपाइको मत


सम्बन्धित शीर्षकहरु

यसपाली को world Cup कसले जित्ला?