ग्रेट बुद्धिष्ट ट्रेल माउन्टेनबाइक र्‍याली शुरु

साहसिक तथा आध्यात्मिक पर्यटन प्रबर्द्धन गर्ने उद्देश्यले आयोजना गरिएको
दोस्रो ग्रेट बुद्धिष्ट ट्रेल माउन्टेनबाइक र्‍याली  आइतबारबाट शुरु भएको छ |

अन्तराष्ट्रिय बुद्धिष्ट समाजका अध्यक्ष मैत्री भिक्षुले विश्व सम्पदा
क्षेत्रमा सुचिकृत स्वयम्भु स्तुप परिसरमा एक समारोहका बीच र्‍यालीको शुरुवात
गर्नुभएको हो | उद्घाटनमा सांसद कृष्णगोपाल श्रेष्ठ विशिष्ट अतीथी र नेपाल
खड्गी समाजका मनोज नेवा अतिथिका रुपमा उपस्थित हुनुहुन्थ्यो |  त्यसअघि
स्वयम्भु अजिमा मन्दिरमा बिशेष पूजा-आजा गरिएको थियो  
'प्राचिन नेवा सभ्यता (स्वयम्भु) देखि, प्राचिन शाक्यमुनि सभ्यता (कपिलवस्तु)
सम्म' नारा सहित आयोजना गरिएको र्‍याली  मंगलबार लुम्बिनी पुग्नेछ |
साइक्लिस्टहरु प्रथम दिन ९० किलोमिटरको दुरी पार गरि हेटौडा पुग्नेछन् | दोस्रो
दिन १०२ किलोमिटरको दुरी पार गरि कावासोती पुगी तेस्रो तिन लुम्बिनी पुग्नेछन्
| 
चौथो तिन सबै प्रतियोगी साइक्लिस्टहरु प्रतिस्पर्धात्मक साईक्लिंग रेसमा भाग
लिनेछन् | प्रतियोगितामा पुरुष, महिला र मास्टर्स गरी तीन स्पर्धा हुनेछन् |
पुरुष र महिला स्पर्धाका बिजेता तथा उपबिजेताहरुले क्रमश नगद रु ७७,७७७, रु
५५,५५५ र रु ३३,३३३ प्राप्त गर्नेछन् भने मास्टर्सका बिजेता तथा उपबिजेताहरुले
क्रमश रु ३३,३३३, रु २१,१११ रु १४,१११ नगद पुरस्कार प्राप्त गर्नेछन् |

कार्यक्रम संयोजक दिपक राईका अनुसार यात्राका रुट लामो अनुसन्धान पछी छानिएको
हो | "यो रुटमा अपहिल, डाउनहिल पर्याप्त मात्रामा छ र रुटमा प्राकृतिक,
धार्मिक, बुद्धिष्ट र आध्यात्मिक आकर्षणहरु यथेष्ठ संख्यामा रहेकाछन्," उनले
बताए | 

त्यसैगरि साइकल र्यालीका परिकल्पनाकार बिक्रम पाँडेकाजीले कार्यक्रमको उद्देश्य
देशका दुइ महत्वपूर्ण सभ्यताहरू – स्वयम्भु नेवा सभ्यता र कपिलवस्तु शाक्यमुनि
सभ्यता – लाइ साहसिक तथा आध्यात्मिक गतिबिधिको माध्यमबाट जोडी देशलाई एक नयाँ
पयर्टन गतिबिधि र स्थानियहरुलाई पर्यटनको माध्यमबाट आयआर्जनको नौलो अबसरहरु
सिर्जना गर्नुभएको बताउनुभयो | "दोस्रो बर्षमा नै यस कार्यक्रमको संख्यात्मक र
गुणात्मक वृद्धि देखेर हामीलाई थप हौसला  मिलेको छ |"

कार्यक्रमको समापन सिद्धार्थ गौतम बोधगयामा ज्ञान प्राप्त गरेर घर गरेको दिन
अर्थात फागु पुर्णिमाको दिन हुनेछ | 

कार्यक्रमको आयोजन बुद्धिष्ट सर्किट्स डट कम ले गरेको हो | र्‍यालीमा ६८ साइक्लिस्टको सहभागिता रहेको छ |